ڈیمنشیا کے خطرے کو کم کرنے میں نرسوں کی رہنمائی والا پروگرام کامیاب، تحقیق

میلبورن: آسٹریلیا کی موناش یونیورسٹی کی نئی تحقیق سے معلوم ہوا ہے کہ نرسوں کی رہنمائی والا ایک پروگرام درمیانی عمر کے افراد میں ڈیمنشیا کے خطرے کو کم کرنے میں مددگار ثابت ہو سکتا ہے، اور یہ دماغی صحت کی دیکھ بھال کا ایک عملی نیا طریقہ پیش کرتا ہے۔ تحقیق میں 45 سے 65 سال کی عمر کے 403 سے زائد افراد شامل کیے گئے، جو آسٹریلیا بھر کی 31 جنرل پریکٹس کلینکس سے وابستہ تھے۔ ان افراد میں ڈیمنشیا کے قابل تبدیلی خطرات موجود تھے، جیسے جسمانی سرگرمی کی کمی، غیر صحت مند غذا اور بلند فشار خون۔ بارہ ماہ تک جاری رہنے والے اس پروگرام میں نرسوں نے شرکاء کی انفرادی صحت کی جانچ کی، انہیں عملی اہداف دیے اور ہیپی مائنڈ ایپ کے ذریعے ان کی پیش رفت پر نظر رکھی۔ نتائج سے معلوم ہوا کہ اس گروپ کے ڈیمنشیا رسک اسکور میں معمول کی دیکھ بھال کے مقابلے میں نمایاں بہتری آئی۔ تحقیق دی لینسٹ ریجنل ہیلتھ ویسٹرن پیسیفک میں شائع ہوئی ہے۔ سینئر محقق ایسوسی ایٹ پروفیسر جانسن جارج کا کہنا ہے کہ دماغی صحت کے لیے ایسے پروگراموں کو بنیادی صحت کی دیکھ بھال میں شامل کرنا طویل مدت میں معاشرے کے لیے فائدہ مند ہو سکتا ہے۔