کنشاسا: جمہوریہ کانگو میں ہیضے کی وبا کے خلاف ایک بڑی ویکسینیشن مہم جاری ہے، جس کے تحت 20 لاکھ بے گھر افراد کو ویکسین لگائی جا رہی ہے۔ یہ مہم تین نومبر کو شروع ہوئی تھی اور آج دس نومبر کو اپنے پہلے مرحلے کی تکمیل کو پہنچ رہی ہے۔
عالمی ادارہ صحت کے مطابق کانگو میں اکتوبر کے آخر تک ہیضے کے تقریباً 60 ہزار کیسز ریکارڈ کیے جا چکے ہیں۔ مہم کا آغاز مغربی صوبے ایکوئٹر سے ہوا، جہاں بے گھر افراد کی بڑی آبادی موجود ہے، اور آج سے یہ مہم مائی ندومبے صوبے میں شروع ہو رہی ہے، جبکہ 24 نومبر کو دارالحکومت کنشاسا کی باری آئے گی۔
یہ مہم ہمسایہ ملک کانگو برازاویل کے اشتراک سے چلائی جا رہی ہے۔ عالمی ادارہ صحت کے ہیضے کے امور کے ذمہ دار پروفیسر دیدیے بومپانگے کے مطابق بارشوں کا موسم اور بڑھتا ہوا پانی مہم کے لیے سب سے بڑا چیلنج ہے، کیونکہ سیلابی پانی وبا کے پھیلاؤ کو تیز کر سکتا ہے۔
صحت کے ماہرین کا کہنا ہے کہ ہیضہ آلودہ پانی سے پھیلتا ہے اور بروقت ویکسینیشن اور صاف پانی کی فراہمی سے اس پر قابو پایا جا سکتا ہے۔
No comments:
Post a Comment