ایران کے وزیر خارجہ کی اسلام آباد آمد، امریکہ اور ایران میں بات چیت کی کوششوں میں پاکستان کا کردار نمایاں

اسلام آباد: ایران کے وزیر خارجہ عباس عراقچی پیر کے روز اسلام آباد پہنچے، جسے پاکستان اور ایران کے درمیان سفارتی رابطوں میں ایک اہم پیشرفت قرار دیا جا رہا ہے۔ ذرائع کے مطابق اس دورے کا مقصد امریکہ اور ایران کے درمیان بڑھتے ہوئے تناؤ میں کمی لانے کے لیے بالواسطہ مذاکرات کا راستہ ہموار کرنا ہے۔

پاکستان ان مذاکرات میں ثالث کا کردار ادا کر رہا ہے۔ ایرانی وزیر خارجہ نے کہا ہے کہ تہران قطر اور پاکستان کے ذریعے "گہرے ڈپلومیسی رابطوں" میں مصروف ہے، اگرچہ ایرانی حکام نے واضح کیا ہے کہ فی الحال کوئی براہِ راست بات چیت منصوبہ بند نہیں، تاہم ایران کے تحفظات ثالث ملک پاکستان تک پہنچا دیے گئے ہیں۔

اس سے قبل وزیر خارجہ اسحاق ڈار نے ایرانی ہم منصب سے ٹیلی فون پر بات چیت میں امریکہ اور ایران کے درمیان جنگ بندی کو برقرار رکھنے اور موجودہ تفاہیم کے ٹوٹنے سے بچنے پر زور دیا۔

اطلاعات کے مطابق امریکہ کے خصوصی ایلچی اسٹیو وٹکاف اور جیرڈ کشنر بھی آج اسلام آباد پہنچنے والے ہیں، جس سے سفارتی سرگرمیوں میں مزید تیزی کی توقع ہے۔ مبصرین کے مطابق خطے میں کشیدگی کم کرنے کے لیے یہ کوششیں انتہائی اہم ہیں۔