بلے جین کنگ کپ میں پاکستان کی تاریخی شروعات، بحرین کو 3-0 سے شکست

 

پاکستان نے بلے جین کنگ کپ کے ایشیا/اوشنیا گروپ تھری مقابلوں میں اپنے سفر کا شاندار آغاز کیا ہے اور گروپ اے کے میچ میں بحرین کو 3-0 سے شکست دے دی ہے۔ اسلام آباد کے پی ٹی ایف ٹینس کمپلیکس میں کھیلے گئے اس مقابلے میں پاکستانی کھلاڑیوں نے تینوں میچ یکطرفہ انداز میں جیتے۔

پاکستان کی اعلیٰ کھلاڑی عشنا سہیل نے حجر زیدان کو 6-0، 6-0 سے اور ماہین آفتاب نے غرم الخیاط کو 6-0، 6-0 سے شکست دی۔ اس کے بعد دونوں نے ڈبلز میں مل کر 6-1، 6-0 سے کامیابی حاصل کر کے ٹیم کی فتح پر مہر ثبت کی۔

یہ مقابلے پاکستان کے لیے اس لیے بھی تاریخی ہیں کہ ملک پہلی بار خواتین کے اس معروف بین الاقوامی ٹیم ٹینس مقابلے کی میزبانی کر رہا ہے۔ اسی روز کے دیگر میچوں میں مالدیپ نے بھوٹان کو 3-0، ایران نے کویت کو 3-0 اور اردن نے قطر کو 2-1 سے ہرا دیا۔