حوثی باغیوں کے تازہ حملوں کے بعد سعودی عرب کے شہر دمام میں کنگ فہد بین الاقوامی ہوائی اڈے پر ہونے والے حملے میں ایک شخص ہلاک اور آٹھ زخمی ہو گئے ہیں۔ سعودی سول ایوی ایشن اتھارٹی کے مطابق حملہ بدھ کی رات دیر گئے کیا گیا جس سے ہوائی اڈے کو کچھ مادی نقصان بھی پہنچا اور پروازیں متبادل ہوائی اڈوں کی طرف موڑ دی گئیں۔
سعودی وزارت توانائی کے مطابق حوثی ڈرون کے ملبے سے ملک کے جنوب مشرق میں واقع آرامکو کے تیل کے میدان میں دو افراد ہلاک اور دو زخمی ہوئے۔ ہلاک ہونے والے نیپال اور فلپائن کے شہری جبکہ زخمیوں میں پاکستانی اور بھارتی شہری شامل بتائے گئے ہیں۔
بڑھتی ہوئی کشیدگی کے پیش نظر امریکا نے سعودی عرب میں اپنے بعض مشنوں سے سفارتکاروں کے اہل خانہ کی واپسی کا حکم دے دیا ہے۔ عالمی منڈی میں تیل کی قیمتوں میں بھی اضافہ ہو گیا ہے اور برینٹ کروڈ 1.2 فیصد بڑھ کر 110.11 ڈالر فی بیرل تک پہنچ گیا ہے۔ مبصرین کے مطابق خطے میں مزید کشیدگی سے عالمی توانائی منڈی پر دباؤ بڑھنے کا خدشہ ہے۔
No comments:
Post a Comment