صدر آصف علی زرداری کا تین روزہ دورہ جرمنی، دوطرفہ تجارت پر بات چیت

 

صدر مملکت آصف علی زرداری جمعرات کو جرمنی کے تین روزہ سرکاری دورے پر روانہ ہو گئے ہیں۔ یہ دورہ 22 سے 24 اکتوبر تک جاری رہے گا اور اس دوران وہ جرمن قیادت سے ملاقاتیں کریں گے۔ ایوان صدر کے مطابق صدر مملکت لاہور سے جرمنی کے لیے روانہ ہوئے ہیں۔

دفتر خارجہ کے مطابق یہ دورہ پاکستان اور جرمنی کے درمیان سفارتی تعلقات کے 75 سال مکمل ہونے کے موقع پر ہو رہا ہے اور یہ دونوں ممالک کے درمیان اعلیٰ سطح کے تبادلوں کا حصہ ہے۔ دفتر خارجہ کا کہنا ہے کہ اس دورے کو دونوں ممالک کے تعلقات کے تناظر میں خصوصی اہمیت حاصل ہے۔

دورے کے دوران صدر زرداری جرمن صدر فرینک والٹر شٹائن میئر کے ساتھ ساتھ جرمنی کی اعلیٰ قیادت اور کاروباری رہنماؤں سے ملاقاتیں کریں گے جن میں معاشی اور تجارتی تعاون پر خصوصی توجہ دی جائے گی۔ دوطرفہ تعلقات کے فروغ کے ساتھ ساتھ تجارتی شعبے میں نئے مواقع پر بھی بات چیت متوقع ہے۔

دفتر خارجہ کا کہنا ہے کہ یہ دورہ دونوں ممالک کی شراکت داری کو مزید مضبوط بنانے کے گہرے عزم کی عکاسی کرتا ہے اور اس سے پاکستان اور جرمنی کے درمیان تعاون کے نئے دروازے کھلیں گے۔