بلوچستان میں انٹیلی جنس آپریشنز — 4 دہشت گرد ہلاک، میجر وجاہت وحید شہید

بلوچستان میں سیکیورٹی فورسز کے انٹیلی جنس پر مبنی آپریشنز کے دوران چار دہشت گرد مارے گئے جبکہ ایک آرمی افسر جام شہادت نوش کر گیا۔ پاک فوج کے شعبہ تعلقات عامہ (آئی ایس پی آر) کے مطابق یہ کارروائیاں ضلع گوادر کے علاقے شادی کور اور ضلع قلات کے علاقے جتک آباد میں کی گئیں۔

آئی ایس پی آر کے بیان میں بتایا گیا کہ 18 اکتوبر کو قلات کے علاقے جتک آباد میں آپریشن کے دوران چار دہشت گرد مارے گئے اور ان کے قبضے سے اسلحہ اور گولہ بارود کا بڑا ذخیرہ بھی برآمد ہوا۔ یہ کارروائیاں خفیہ اطلاعات پر "فتنۃ الہندوستان" کے ٹھکانوں کے خلاف کی گئیں۔

دوسری جانب گوادر کے علاقے شادی کور تحصیل پسنی میں کلیئرنس آپریشن کے دوران ایک دھماکا ہوا جس میں 34 سالہ میجر وجاہت وحید شہید ہو گئے۔ میجر وحید لاہور کے رہائشی تھے اور فورسز کے اگلے دستے کی قیادت کر رہے تھے۔

بیان میں مزید کہا گیا کہ علاقے میں دیگر دہشت گردوں کے خاتمے کے لیے صفائی کے آپریشنز جاری رہیں گے اور "عزم استحکام" کے تحت دہشت گردی کے خلاف کارروائیاں پوری قوت سے جاری رہیں گی۔